· O Ministerio para a Transición Ecolóxica publica hoxe no BOE o inicio do prazo para presentar alegacións .
· Este feito supón un paso adiante que o Concello de Bergondo espera que sexa o definitivo para a aprobación dunha mellora prevista desde o 2019.
· O plan para evitar desprendementos é o único pendente no areal, tras os traballos municipais para mellorar a calidade das augas, que alcanzaron a cualificación de ‘Excelente’ para o baño.
O proxecto de contención dos noiros da praia de Ou Regueiro sae do seu bloqueo. E faio co inicio do prazo dun novo proceso de exposición pública, como anuncia o Ministerio para a Transición Ecolóxica e o Reto Demográfico no BOE de hoxe e como lle era comunicado á alcaldesa de Bergondo, Alejandra Pérez Máquez, desde a Demarcación de Costas o pasado mes.
O proxecto ‘Tratamento ambiental do bordo litoral de praia do Regueiro, no T.M. de Bergondo (A Coruña)’ xa foi sometido a información pública no ano 2019. De feito, conseguiuse que estivese en tramitación e obtivéronse por escrito os compromisos de cesión dos propietarios dos terreos afectados.
Pero entón, unha actualización do Catastro incorporou unha nova parcela ao longo de toda a costa que delimitou o novo espazo de dominio público. Esa actualización xerou unha nova situación e conduciu a que a Demarcación de Costas corrixise o proxecto inicial, que desde entón seguía pendente do visto e prace por parte dos organismos estatais.
Agora, o anuncio do inicio dun novo proceso de información pública supón un paso adiante no plan de actuación para, esperamos, concretalo de maneira definitiva.
A documentación poderá consultarse nas dependencias do Concello de Bergondo durante os próximos 20 días hábiles. Tamén existe a posibilidade de acudir á Demarcación de Costas na Coruña (previa petición de cita) ou de revisalo de maneira telemática na web do Ministerio para a Transición Ecolóxica e o Reto Demográfico.
As actuacións previstas
A actuación conta cun orzamento de 1.064.201,17 euros para acabar co gran problema de seguridade da praia debido aos desprendementos que se producen recurrentemente. Un problema que non só afecta os usuarios da praia, que conta con sinais que avisan do perigo, senón aos propietarios dos terreos lindeiros, danados pola acción da erosión do mar.
A actuación, que ademais permitirá fomentar a biodiversidade da zona, vén continuar a protección do bordo costeiro da zona Este, xa executada, nunha lonxitude de 300 metros aproximadamente. Construirase un dique de protección coroada cunha senda para posibilitar a accesibilidade da costa. Ademais, está prevista a instalación de ramplas de acceso ao areal onde actualmente existen unhas escaleiras.
Tamén se colocará unha malla volumétrica de protección dos noiros nas zonas máis expostas para evitar a erosión. Por último, executarase unha pasarela de madeira tratada no inicio da actuación para salvar o leito do rego do Cabanés. A pasarela terá unha luz de aproximadamente 6 metros e contará con varandas, ramplas de acceso, bancos e papeleiras.
O desbloqueo deste proxecto permitirá culminar as actuacións na praia de Ou Regueiro, que recentemente foi sometida a revisión da calidade das súas augas. As diferentes analíticas realizadas pola Consellería de Sanidade lanzaron o resultado de ‘Excelente’ para o baño, polo que o areal pasou a formar parte de forma definitiva do censo. O regreso a esta lista foi posible grazas aos traballos municipais dos últimos anos na contorna da praia en cuestión de saneamento.
